BOCCO KUIKOSA MTIBWA SUGAR

JOHN BOCCO.

IKIWA imebakiwa wiki moja kabla ya mchezo Ngao ya Hisani dhidi ya Mtibwa Sugar, Simba itakosa huduma ya nahodha na mshambuliaji wake, John Bocco.

Bocco ataukosa mchezo huo kutokana na kuwa majeruhi yaliyomfanya pia kushindwa kucheza mchezo wa juzi dhidi ya Asante Kotoko kutoka Ghana ambao ulimalizika kwa sare ya bao 1-1.

Alipoulizwa sababu ya Bocco kutocheza mchezo huo licha ya kuwapo kwenye benchi, kocha wa Simba, Patrick Aussems alisema kuwa Bocco ni majeruhi na huenda pia akaukosa mchezo wa kwanza wa msimu mpya Ligi Kuu Bara dhidi ya Tanzania Prisons kutoka jijini Mbeya.

"John ni majeruhi na anaweza akakosa mchezo wa kwanza wa ligi... tunampa muda wa kupona kabisa," alisema Aussems.

Katika mchezo wa juzi, Aussems akitumia mfumo wa 4-4-2, nafasi ya ushambuliaji aliwaanzisha Emmanuel Okwi na Meddie Kagere na baadae kumtoa Kagere na kuingia Adam Salamba.

Aussems, alisema Simba inawachezaji wengi na wote wana uwezo mkubwa hivyo hana hofu kukosekana kwa nahodha wake.