MCHEZAJI WA LIVERPOOL AISIFU SERENGETI BOYS

NYOTA wa zamani wa klabu ya Liverpool ya England, John Barnes, ameisifia timu ya taifa ya vijana wenye umri wa chini ya miaka 17 'Serengeti Boys' kwa uwezo mkubwa walionao.

Barnes, alisema Serengeti Boys wanauwezo mkubwa ndani ya Uwanja.

Kauri hiyo ya Barnes aliitoa jana kwenye viwanja vya Jakaya Kikwete Youth Park wakati akitoa mafundisho ya mbinu za soka kwa timu hiyo.

Alisema kikosi hicho cha Serengeti Boys kipo imara na kwa namna alivyoiona wana uwezo wa kupambana na timu zingine za vijana za Ulaya.

“Tofauti peke ya timu za Afrika na Ulaya ipo kwenye miundo mbinu, mnafahamu timu za Ulaya zinafaida ya kuwa na miundo mbinu yote muhimu kama vile viwanja na vifaa, huku Afrika inahitajika kazi kubwa kufanywa," alisema Barnes.

Aidha, alisema timu hiyo ya vijana inapaswa kupewa muda mrefu na mzuri wa maandalizi ili kupata matokeo mazuri siku za usoni.

“Tuwape muda hawa vijana, muda wa kufanya maandalizi kitu kitakachowafanya kufahamiana vizuri, na pia wanahitaji sapoti yetu na tuwape moyo hata pale wanaposhindwa kitu," alisema Barnes.

Akizungumzia ujio wa mkongwe huyo, Mkuu wa Mahusiano na Masoko wa benki ya Standard Chartered Juanita Mramba, alisema ujio wa mkongwe huyo utahamasisha soka kwa vijana.