HIVI NDIVYO USAJILI UNAVYOTINGISHA BONGO

WAKATI michuano ya Kombe la Dunia inaendelea nchini Urusi,  Kombe la Kagame pia likirindima nchini, barani  Ulaya mambo ya usajili yamekuwa yakiendelea kama kawaida.

Nchini pia mambo ni hivyo hivyo, usajili umekuwa ukipamba  moto.

Kila klabu inasaka wachezaji ambao inaona kuwa itawasaidia kwenye msimu mpya wa Ligi Kuu Tanzania Bara 2018/19.

Tayari Shirikisho la Soka nchini (TFF), limeshafungua dirisha la usajili tangu Juni 15 na linatarajiwa kufungwa Julai 26, mwaka huu.

Wafuatao ni wachezaji kutoka ndani na nje ya nchi ambao tayari  wameshatua kwenye klabu mpya na kuthibitishwa rasmi.

1. Donald Ngoma-Azam FC

Straika huyu hatari wa zamani wa Yanga raia wa Zimbabwe, ametua kwenye klabu ya Azam FC. Ingawa imeelezwa bado ana majeraha, lakini wakati ligi itakapokuwa imeanza atakuwa amebakisha wiki chache kati ya zile alizotakiwa kupumzika kwa mujibu wa madaktari wake.

2. Tafadza Kutinyu-Azam FC

Ni Mzimbabwe mwingine aliyetua kwenye klabu ya Azam FC kwa ajili ya msimu ujao wa Ligi Kuu. Huyu naye si mgeni sana masikioni mwa mashabiki wa soka, kwani msimu uliomalizika alikuwa akiichezea Singida United.

3. Meddie Kagere-Simba

Ni mzaliwa na Uganda mwenye uraia wa Rwanda. Ni mmoja wa  mastraika hatari kwenye ukanda huu wa Afrika Mashariki na Kati.

Straika huyo amesajiliwa na klabu ya Simba  akitokea Gor Mahia ya Kenya. Ameanza kuonyesha cheche zake  kwenye michuano ya Kagame inayoendelea.

4. Tiba John-Singida United

Anacheza kama kiungo wakati mwingina straika. Msimu uliomalizika alikuwa akiichezea Ndanda FC. Lakini msimu ujao wa  ligi mashabiki watamuona akiwa ametinga uzi wa timu ya Singida United. Tayari ameanza kung'ara kwenye Kombe la Kagame.

5. Adam Salamba-Simba

Msimu uliomalizika alichezea timu mbili. Nusu msimu wa kwanza  alikuwa na Stand United, kabla ya kujiunga na Lipuli kwenye mzunguko wa pili wa Ligi Kuu iliyomalizika.

Kwa sasa amesajiliwa na Simba kwa ajili ya msimu ujao. Ameshaanza kuichezea timu hiyo kwenye michuano mbaliambali; ya SportPesa Super Cup nchini Kenya na Kagame Cup inayoendelea nchini.

6. Juma Kaseja-KMC

Ni kipa wa zamani wa klabu za Simba na Yanga na hata Mbeya  City. Msimu uliomalizika alikuwa akiidakia Kagera Sugar na  kufanya vizuri.

Mkongwe huyo kuelekea msimu ujao amesajiliwa na timu  iliyopanda daraja msimu huu ya KMC ya Kinondoni.

7. Eliuter Mpepo-Singida United

Huyu alikuwa ni straika tegemeo kwenye timu ya Prisons ya Mbeya.

Kwa sasa amejiunga na Singida United na tayari ameanza kuichezea timu hiyo kwenye michuano ya Kombe la Kagame.

8. Yusuph Ndikumana-KMC

Klabu ya KMC iliendelea kushangaza wengi, kwani baada ya  kumsajili Kaseja, ikamsajili beki kisiki wa Mbao FC, Yusuph  Ndikumana. Msimu uliopita timu za Simba na Yanga zilishindwa  kumsajili kutokana na dau lake kuwa kubwa.

9. Habib Kyombo-Singida United

Alitwaa tuzo ya straika kijana kwenye Ligi Kuu Tanzania Bara.  Msimu huu amejiunga na Singida United, akitokea Mbao FC. Ni  mmoja wa mastraika hatari na tegemeo baadaye nchini.

10. Sadala Mohamed-KMC

Ni beki aliyekuwa akiitumikia Mbao FC, lakini kwa sasa tayari  ameshatua kwenye klabu ya KMC kwa ajili ya kuichezea Ligi Kuu  Tanzania Bara msimu ujao wa ligi.

11. Mohamed Rashid-Simba

Alikuwa straika wa kutumainiwa na Prisons ya Mbeya msimu  uliomalizika. Msimu huu amejiunga na mabingwa wapya Simba na tayari wanachama na mashabiki wa timu hiyo wameshamshuhudia  kwenye mechi mbalimbali, zikiwamo za Kombe la Kagame.

12. Marcel Kaheza-Simba

Alikuwa na msimu mzuri uliomalizika, akiichezea timu ya Majimaji  ya Songea. Msimu ujao ataonekana akiwa amevaa uzi wa Simba.

Tayari wanachama na mashabiki wa timu hiyo wameshaanza  kumshuhudia kwenye michuano ya Kombe la Kagame.