ZANZIBAR KUJITEGEMEA KWA MICHEZO MINGINE ZAIDI YA SOKA

Serikali imebariki vyama vya michezo mingine visiwani Zanzibar kujitegemea kimataifa kama walivyofanya wenzao wa soka.

Kauli ya Serikali imekuja siku chache baada ya visiwa hivyo kupata uanachama wa kudumu kwenye Shirikisho la Soka Afrika (CAF).

Serikali kupitia Baraza la Michezo la Taifa (BMT) limeshauri vyama vingine vya michezo kuanza utaratibu wa kuiombea Zanzibar uanachama wa Afrika ili ishiriki mashindano ya Afrika kama nchi.

“Katika masuala ya Muungano, sekta ya michezo haikujumuishwa ndiyo sababu Zanzibar ina baraza lake la michezo (BMZ) na kurugenzi ya maendeleo ya michezo,” alisema Katibu Mkuu wa BMT, Mohamed Kiganja na kuongeza.

“Tulikuwa tukitumia majadiliano katika uteuzi wa timu pale tunapojiandaa na Michezo ya Afrika au Michezo ya Jumuiya ya Madola na hata Michezo ya Olimpiki, lakini kipindi hicho hutawaliwa na vurugu kweli kweli kwani kila mmoja huvutia kwake.

“Huu ni wakati sasa wa vyama vingine vya michezo navyo kuamua kuiombea Zanzibar uanachama wa Afrika ili ishiriki kama nchi kwenye michezo mingine mbali na soka,” alisema Kiganja.

Wakizungumzia harakati kama zitawezekana, Mwenyekiti wa Chama cha Netiboli Tanzania (Chaneta), Anna Kibira na Katibu Mkuu wa Kamati ya Olimpiki Tanzania (TOC), Filbert Bayi walionyesha mtizamo hasi juu ya mpango huo.

“Soka walioamua kujitenga waache wafanye hivyo wao wana maslahi yao, lakini Chaneta na Chaneza tutaendelea kuungana kimataifa, sisi ni wamoja halafu mambo haya sitaki kuyazungumzia zaidi kwani ni ya kisiasa,” alisema Kibira.

Bayi kwa upande wake alisema hana hoja katika hilo kwani ni suala la kisiasa zaidi kuomba uanachama wa Afrika au kuungana na ule wa dunia.