UKAME WA MABOA KWA KICHUYA UMEFANYA AYASEME HAYA

WINGA wa timu ya Simba, Shiza Kichuya,  ameweka wazi kwamba ukame wake wa mabao umekuja baada ya kugundua halikuwa jukumu lake kuhakikisha anafunga katika kila mchezo, wakati wapo wachezaji wanaocheza nafasi halisi zenye jukumu hilo.

Kichuya ambaye alijiunga na Simba msimu huu akitokea klabu ya Mtibwa Sugar, alianza kwa kasi ndani ya klabu ya wekundu wa Msimbazi na Ligi Kuu Tanzania Bara, baada ya kufumania nyavu mara tisa ndani ya michezo 13 pekee.

Mara ya mwisho winga huyu kufunga bao ilikuwa dhidi ya Stand United, Novemba mwaka jana mjini Shinyanga, katika mchezo wa ligi ambao klabu ya Simba iliibuka kidedea huku Kichuya akifunga bao hilo kwa mkwaju wa penalti.

Shaffihdauda.co.tz imezungumza na Kichuya, ambapo amesema alikuwa akijipa jukumu kubwa ambalo si lake na kusababisha kuwa mchoyo wa kutoa pasi za mabao kwa wachezaji wenzake uwanjani.

“Kila mchezaji ana jukumu la kufunga na kuisaidia timu pale inapozidiwa  lakini wapo wachezaji ambao wanacheza nafasi zinazowafanya kuwa na jukumu hilo la kupachika magoli kama vile Mavugo, Ajibu, Liuzio na wengine,” – Kichuya.

“Simaanishi kwamba wachezaji wengine hawapaswi kufunga, lakini kuna wachezaji ambao wao jukumu lao ni kufunga mabao.”

Mchezaji huyo ambae kwasasa amekuwa akitokea benchi alisema Kwa sasa hatolazimisha  kufunga kama ilivyokuwa zamani: “Nitakuwa nikitoa pasi za mabao zaidi labda niwe katika nafasi ya kufunga ndio nitafanya hivyo.”