KASEJA AWAPA ZA USO WABAYA WAKE

 

Golikipa wa Kagera Sugar, amesema kuwa ataendelea kuwashangaza wale wote wanaoponda uwezo wake kuhakikisha anaisaidia klabu yake kumaliza kwenye nafasi za juu kwenye Ligi Kuu Tanzania bara.
Wiki iliyopita Kaseja alitangazwa na Shirikisho la Soka Tanzania (TFF) kuwa mchezaji bora wa Ligi Kuu wa mwezi Januari.
Kaseja aliliambia gazeti hili kuwa anafahamu wapo wanaoponda uwezo wake na kumuona kama amezeeka na anapaswa kukaa pembeni.
"Mpira si mchezo wa chumbani.., yaani si mchezo wa kujificha, ni mchezo unaocheza mbele ya watu hivyo uwezo wako utaonekana tu, wanaonisema vibaya waendelee kusema lakini nitaendelea kuwashangaza kwa kufanya vizuri na kuisaidia timu yangu," alisema golikipa huyo namba moja wa Kagera Sugar .
Alisema tuzo ya mwezi aliyoipata hivi karibuni ni kielelezo kuwa uwezo wake unaonekana wazi kwa wanaofahamu soka na kulifuatilia.
"Wanaosema nimekwisha au nimezeeka waendelee, ila mimi bado nina uwezo mkubwa na nitauonyesha kwenye michezo yetu," alisema.
Kwa sasa Kaseja ndio kipa tegemeo wa Kagera Sugar baada ya timu hiyo kufiwa na kipa wake David Burhan huku kipa mwingine Hussein Sharif 'Casillas' kusimamishwa kwa tuhuma za kufungisha kwenye mchezo dhidi ya Yanga uliochezwa Oktoba mwaka jana na timu hiyo kufungwa bao 6-2.