OMOG ASEMA SASA NI AKILI NA NGUVU

KOCHA Mkuu wa Simba, Mcameroon Joseph Omog, amesema “vita bado inaendelea” na kwamba kikosi chake hakijamaliza kazi waliyoianza Agosti mwaka jana ya kuwania ubingwa wa Ligi Kuu Tanzania Bara.

Aidha, ameeleza kuwa kesho Jumamosi watashuka kuivaa Mbeya City kwa kutumia nguvu na akili nyingi.

"Tunahitaji kuwa mabingwa, sina kingine ninachoweza kukuelezea," alisema kwa kifupi Mcameroon huyo.

Omog alisema anajua wachezaji wa Mbeya City wanatumia nguvu, hivyo yeye ameongeza ‘akili' ili kuhakikisha wanaondoka na pointi tatu muhimu.

Kocha huyo alisema pia licha ya kikosi chake kukabiliwa na majeruhi, bado anawaamini wachezaji wengine waliosalia na kwenye soka hilo ni jambo la kawaida.

Wachezaji wa Simba ambao watakosekana katika mechi hiyo ni pamoja na Janvier Bukungu ambaye alionyeshwa kadi nyekundu katika mchezo uliopita dhidi ya Yanga na Method Mwanjali ambaye ni majeruhi.